గురువుగారిపై పూల (బాల )జల్లు

గురువుగారి పుట్టినరోజు - శిష్యుడికి పండగ రోజు 

రాష్ట్ర ఆర్ధిక, సాంఘిక పరిస్థితులతో పాటు, దేశ సాంస్కృతి, ప్రపంచ చరిత్రపై లోతైన అవగాహన కలిగి నిత్యం ప్రజాసమస్యలపై టీవీ కార్యక్రమాల్లో పాల్గొడమే కాక తరుచుగా ప్రజాక్షేత్రంలో జనజాగృత యజ్ఞాలు నిర్వహించిన సోమయాజి, జ్ఞాన దక్షుడు, గుణనిధి, అకుంఠిత ధర్మ పరిరక్షణా దీక్షాపరుడు క్రియాశీలి కృష్ణంరాజు. స్వపర బేధాలు చూడక తప్పైతే ఎంతటివారినైనా ఖండించే ఖడ్గం, సంచలనాత్మక వార్తలకోసం కాక మేధో మథనం కోరి సంచార జీవితం జరుపుతున్న బహుగ్రంథ కర్త, బహు నగర విహర్త బహుముఖ ప్రజ్ఞాశాలి కృష్ణంరాజు మాగురువుగారు నిన్న షష్టి పూర్తి జన్మదినం జరుపుకున్నారు. 

తే. కారె  జనహితు లెల్లరు ఘన  కార్య

   శీలు రేతమ కీర్తిని శిరము( దాల్చి

  జనరె  వెలుగిచ్చి  కారణ  జన్ము  లేమి   

  లెక్క   సేయక  సాగురే   ఱేండ్లు   గారె    

నిన్న వేదికపై గురువుగారి జీవితాన్ని పాటరూపంలో శ్రోతలకు వినిపించాను 

ఎవ్వడురా ఎవ్వడురా ఎవ్వడురా ఇతడెవ్వడురా

జిలిబిలి పలుకుల రాయడురా బోయను మించిన బోయడురా 

ప్రేమతో పిలిచినా ఓయనురా ఏ సాయము కోరిన చేయునురా

ప్రజాక్షేత్రమున పార్థుడురా దాటి గల ధనుర్ధారుడురా

విలక్షణ అక్షర యోధుడురా  ధర్మ సమర్ధన నాథుడురా 

దుష్టమర్ధన యోధుడురా  సాధుడురా రణధీరుడురా  కృష్ణుడురా కృతార్థుడురా. 

ఎక్కడరా ఎక్కడరా ఎక్కడివాడిత డెక్కడరా చక్కనివాడితడిక్కడరా? 

వాడపల్లి  తలిదండ్రులురా వాదములందుదిట్టమురా

కొత్తపల్లివారల్లుడురా కొదకుగొనని ఘన కొట్టమురా 

సురంగపురమున జనియించి తరంగమల్లె పయనించి

ప్రసారమాధ్యమ కాంతులలో  ప్రపంచమంతా ప్రసరించి 

కర్మయోధుడై జర్మను వెల్ల లో మేధోశక్తి తో వెలుగొంది 

కాస్కోయంచు మాస్కోయంచున మేథావులనే మెప్పించి  

తేజరిల్లిన  యోధుడురా  విలక్షణ అక్షర యోధుడురా 

ఆరుఅడుగులా  అర్కుడు రా, శ్రీదేవి కిప్రాణనాథుడురా  

జెమిని జ్యోతుల ప్రభలను దాటి ఆంద్ర జ్యోతిలో అడుగిడెరా

అడుగు అడుగునా  పెరిగెనురా ఆదిత్యునివలె ఎదిగెనురా 

ఆంధ్రఖ్యాతిగా వెలువడెరా జితకాశుడురా జయశీలుడురా 

ఎచ్చట ఎచ్చట ఎచ్చట నుండును వెచ్చనివాడిత డెచ్చట  నుండును?

రాచ హార్మ్యముల కొలువుండడురా    రాచకార్యములు నెరుపునురా 

జనహృదయంలో నిలిచుండి  జనగృహములలో కొలువుండి తేడావస్తే జగమొండి

కోటినేత్రముల ఆత్రముగా నిత్యము అతడిని చూచుచుండగా  

పొసగని చర్చల విసుగు మాటల లొ ధన ధన ధన ధన  ధనుర్బాణములు 

గుప్పించి  మారుతి యై బడి కుప్పించి   నటరాజై నర్తించి  విస్ఫులింగములు గుప్పించు. 

ఖగరాజు జోడితడు  తొగరాజు తోడితడు కరిరాజు ఉరువితడు 

రాజాధిరాజితడు చండకరుడు, చండభుడు అనిందితుడు విదితుఁడు. 

ఎవ్వడురా ఎవ్వడురా ఎవ్వడురా ఇతడెవ్వడురా

జిలిబిలి పలుకుల రాయడురా బోయను మించిన బోయడురా 

ప్రేమతో పిలిచినా ఓయనురా ఏ సాయము కోరిన చేయునురా