పెద్ద రచనల కు ప్రేరణ ప్రేమే సుమా

  పెద్ద రచనల వెనుక ప్రేరణ ప్రేమే సుమా

అతడు  ఇటాలియన్ కవి పండితుడు లాటిన్ లో గొప్ప గ్రంధం వ్రాసి అంతర్జాతీయ  కీర్తి నార్జించాడు.  అతడిపేరు పెట్రార్చ్.  366 సొనెట్స్ రాసిన ప్రపంచంలో అతిపెద్ద సోనెటీర్ . షేక్స్ పియర్ కంటే తోపు.  చాలా  పెద్ద మనిషే  కానీ  పాపం ప్రేమలో పడ్డాడు.  అందులో తప్పేంలేదు కదా  అనొచ్చు.  కానీ  ఆమె వివాహిత.  ఒక  రాజు కి భార్య .

                                                    

లారా దే  నోవెస్ ను  పెట్రార్చ్ తన జీవితకాలం మౌనంగా ప్రేమించాడు.   ఆమె కోసం పరితపిస్తూ సొనెట్‌ను రాసాడు. పెట్రార్చ్  ఆమెను  మొదటిసారి  అవిన్యాన్ నగర చర్చ్ లో 1327లోచూసాడు.  అప్పటికి ఆమె వయసు 15 సంవత్సరాలే. కానీ  ఆమెకు అప్పటికే పెళ్లి అయిపోయింది. ఆమె ఆడిబర్ట్ డి నోవ్స్ అనే రాజు భార్య.    పెళ్లి అయినస్త్రీ  అని తెలిసినా  ప్రేమ ను చంపుకోలేక పోయా డు.   జీవిత కాలం మౌనంగా ఆమెను ఆరాధకుడిగా మిగిలిపోయాడు. ఆమె చర్చికి వచ్చేటప్పుడు చూడడానికే అతడు అక్కడ చర్చిలోనే  ఉండిపోయాడు. ఆమె సమీపంలో ఉండటానికి వాక్లూస్‌లో ఒక చిన్న ఎస్టేట్‌ను కూడా కొనుగోలు చేశాడు. 

పెట్రార్క్ ప్రేమ సాహిత్యం సుమారు 20 సంవత్సరాలు వ్రాసాడు.   ప్రపంచ ప్రఖ్యాతి గాంచిన  షేక్స్ పియర్  తన జీవిత కాలంలో 154 సొనెట్స్ వ్రాయగా పెట్రార్క్ 366 సొనెట్స్ వ్రాసాడు. పెట్రార్క్ సొనెట్స్  చాలా శ్రావ్యంగా ఉంటాయి. షేక్స్పియర్ సొనెట్స్ లో ఈ శ్రావ్యత ఉండదు. ఉప్పెనలా పొంగిన ప్రేమకు సొనెట్స్ రూపాన్ని ఇచ్చి పెట్రార్చ్ ఇటాలియన్ కవిత్వానికి ప్రసిద్ధి చెందాడు  కవిరాజుగా వెలిగాడు. పెట్రార్క్ రాసిన సొనెట్స్   ప్రేమ గురించిన కవితలు.  లారా పట్ల తన ప్రేమను  "లారా" సొనెట్‌లో వ్యక్తపరుస్తాడు.   పెట్రార్చ్ వసంతం రాకను సంతోషం రాకతో పోల్చాడు.  తన ప్రేమలో మాధుర్యాన్ని ప్రపంచానికి  అద్భుతంగా తె ర్సా  రీమా లో  కవితా మాధుర్యంగా పంచాడు అతని ప్రేమ దక్కలేదు.  దుఃఖమే దక్కింది. 

పెట్రార్చ్ అంతర్జాతీయ పండితుడు మరియు కవి, దౌత్యవేత్త వేరొక చోటకి  వెళ్లగలిగిన సమర్థుడే కానీ అవిన్యాన్లోనే జీవితం గడిపేశాడు. చర్చి కెరీర్ అతన్ని వివాహం చేసుకోవడానికి అనుమతించలేదు.   అతడు తన ప్రేమను మౌనంగా సమాధిచేసినా  అతడి సొనెట్స్  అతడి హృదయాన్ని తెరిచి ప్రపంచానికి చూపాయి.  

ఫ్రాన్సిస్కో  పెట్రార్క్ 1304 న టుస్కాన్  వద్ద జన్మించాడు.  డాంటే అలిఘేరీ అతని తండ్రికి స్నేహితుడు. పెట్రార్క్ తన బాల్యాన్ని ఫ్లోరెన్స్ సమీపంలోని ఇన్సిసా గ్రామంలో గడిపాడు.   బోలో న్యా లో న్యాయశాస్త్రాన్ని అభ్యసించారు. అతని తండ్రి న్యాయవాద వృత్తిలో (నోటరీ) ఉన్నందున, పెట్రార్క్ మరియు అతని సోదరుడు కూడా న్యాయశాస్త్రాన్ని చదవాలని పట్టుబట్టారు. అయితే, పెట్రార్క్  ప్రధానంగా లాటిన్ సాహిత్యంపై ఆసక్తి కలిగి ఉన్నాడు, తండ్రి బలవంతంపై  న్యాయశాస్త్రం చదివినా ఏడు సంవత్సరాలు వృధాగా భావించాడు.  అతను న్యాయవ్యవస్థను న్యాయాన్ని విక్రయించే కళగా భావించినందున, "నేను నా మనస్సు తో వ్యాపారం చేయలేను " అని నిరసించాడు.

తల్లిదండ్రుల మరణం తరువాత, పెట్రార్క్ మరియు అతని సోదరుడు  అవిగ్నాన్‌కు వెళ్లారు, అక్కడ అతను  చర్చ్ కొరకు పనిచేశాడు. ఇక్కడే అతడికి  తన సమయాన్ని  రచనకు అంకితం చేయడానికి అతనికి వీలు చిక్కింది.  అతడు రాసిన మొదటి  గొప్ప ఐతిహాసిక గ్రంధం ఆఫ్రికనస్. దీన్నతడు ప్రాచీన భాష లాటిన్ లో వ్రాసి  యూరోపియన్ ప్రముఖుడిగా ఎదిగారు. పెట్రార్క్ రోమ్ కాపిటల్ పవిత్ర మైదానంలో పట్టాభిషేకం చేయబడ్డారు.  నేడతడు గొప్ప ప్రాచీన ఐతిహాసిక కవిగా పరిగణింపబడతాడు.

ఇటాలియన్  రచయితలనగానే అందరికీ డాంటే  గుర్తొస్తాడు. డాంటే 1265 లో ఫ్లోరెన్స్ లో పుట్టాడు. డాంటేకు 12 సంవ త్సరాల వయస్సు ఉన్నప్పుడు అతని తల్లి మరణించింది.  అతను కుటుంబ స్నేహితుడి కుమార్తె గెమ్మ దొనాతిని వివాహం చేసుకున్నాడు.   డాంటే బీట్రైస్ అనే  అమ్మాయి  ప్రేమలో పడ్డాడు.   బీట్రైస్  డాంటేపై చాలా  ప్రభావం చూపుతుంది  ఆమె పాత్ర డాంటే యొక్క డివైన్ కామెడీకి వెన్నెముకగా ఉంటుంది.

తొమ్మిది సంవత్సరాల వయస్సులో ఉన్నప్పుడు డాంటే  బీట్రైస్ను కలుసుకున్నాడు,  అతనిది చూపులోనే ప్రేమ. వేరొక రితో  పెళ్లి జరిగిపోయినప్పటికీ డాంటే తన ప్రేమను చంపుకోలేక పోయాడు. 1290 లో బీట్రైస్ అనుకోకుండా మరణిం చింది,  డాంటే మానసికంగా ఆస్తిమితుడైయ్యాడు. తరువాత డాంటె వీట న్యోవ  (ది న్యూ లైఫ్) అనే గ్రంధం వ్రాసాడు.  ఇది బీట్రైస్ పట్ల అతని విషాద ప్రేమను వివరిస్తుంది. డాంటే డివైన్ కామెడీ , మరియు పెట్రార్క్  సొనెట్స్  ప్రపంచంలో గొప్ప రచనలు కాదని మనం అనలేము. నా భారతవర్ష గొప్ప రచన కాకపోవచ్చుకానీ  ఏదో దివ్య శక్తి నా రచనకు  కూడా ప్రేరణ గా ఉందేమో!!!